السنة التحضيرية

البداية

أود التنوية مسبقاً ان كل المعروض هنا ينتمي الى تجربة شخصية، وكل شخص له تجربته الخاصه في السنة التحضيرية ؛ لاختلاف مستوى اللغه الانجليزية، ساعات الدوام، الطموح، والشخصية وغيرها..

هناك الكثير من المدونات اللتي تتناول موضوع السنه التحضيرية على اشكال مختلفة, لكن اردت ان استفرد بمدونتي بان احكي لكم كل ما خضت فيه وكل مشاعري تجاه هذه السنه ليكون مختلفاً قليلا عن باقي المدونات. سوف اتكلم عن طبيعة المواد وما تعلمته منها ؛ كيف ادرسها، ماهي طريقة الاسأله. المطروح سيكون بلغة عاميه.

اللغة الانجليزية العامة – ENG-101

7 Credit

هذا الكورس يعتمد على اربع اشياء: كتابة، تحدث، استماع، قراءة

عدد الكتب بيكون على حسب مستواكم الانجليزي لكن على تجربة الكل : البيقينر: 2+3+4+5 الانترميديت : 3+4+5 الادفانس : 4+5 , وفيها تفاصيل اكثر مابتطرق لها لان ممكن يتغير المنهج

هذا اللي طالع عندي بالبلاكبورد

بهذا الشكل تعرفون مستواكم وشعبتكم الانجليزية

توزيع الدرجات (اللي بيكونون بالبلاك بورد) :

كويزات البلاكبورد و IQ مجموعهم 3
البرزنتيشن (تسجيل صوت) + دسكشن (تعليقات على موضوع) كل واحد عليه .5 وبتسوونه مره كل سمستر.
3 براكتس تست اثناء الميدات كل واحد عليه .5 والفاينل عليه 1
5 اسايمنتات ايساي عليه 1
3 اختبارات مدات كل واحد 10 درجات مقسمه على اختياري, سبيكنق (1) , رايتنغ (2). مو متأكده على الرايتنغ
الفاينل 50 درجة

طبعاً, اول مادخلت كلاس الانقلش كنت مو دارسته من سنه لاني اخذته صيفي بالثانوي. كنت جداً مكتئبه: كل اللي حولي ماخذين ايلتس بس ماسوو دروب. كلهم يفهمون كلام المس الا انا افهمها بس مو قادره اتواصل معاها. كنت جداً منحرجه ان اتكلم كنت احس شوي الاكسنت مالي يفشل. لكن مع الوقت بديت اتطور وانافس اللي معاي. اذا احتجت منهم مساعده يرحبون فيني. علموني شنو اكبر الاخطاء اللي اسويها في الـ Essay . تعلمت كثير كثير كثير وحسيت بفرق. لين الحين اذكر اول اختبار كتبت في Essay من ٣ بارغرافات كان شوي ويخلص وقت الاختبار. وبالفاينل ٥ بارغرافات وخلصت بسرررعه.

الإيجابيات:

* الكلمات بتشوفونها بحياتكم وبتحسون وين كنا وليش مامره سمعناها

* مره يطووور واعتبروه كانه معهد تدخلونه عشان تتعلمون, لانها فرصة تطوير لغة.

*استغلو كل كلاس موجودين فيه سمعو اللسننق اقرو الريدنق مره بيطوركم حتى حق المواد العلميه نفس البايو فيه كلمات بتدرسونها بالانقلش بتلقونها بالبايو والعكس بعد. مثل : Inherited و Integrated

* حاولو ماتاخذون الحلول حلو بجهدكم اختبرو نفسكم لان هذا الشي بيثبته في مخكم, وسألو اذا ماعرفتو الحل قولو كيف عرفنا شنو الـ clue

*خذو نوووتس كثير ترا يفيد, انا ماكنت اخذ وبالنهايه اتوووهق مررره بالسبيكنق والرايتنغ. انصح حق هذا الكورس تعتمدون على الأوراق اكثر من الأجهزة ياما ضاعت علينا أشياء وحذفناها بالغلط

*حاولو تاخذون كتب جديده لا تاخذون مستعمل الا بوك ٥ عادي او اذا بتصورون من احد او غيره بس لان الانجلش بيكون فيه نوتس كثييير

*طبعا النوتس بتفيدكم في الفاينل بيختصر عليكم وقت بدال ماتبحثون من جديد على المعاني والجمل وغيره

*اذا عطتكم المس اي شي حق الرايتنغ مواضيع احتفظو فيها تصير من اختبارات قديمه

*اذا جيتو تحلون البراكتس تست حلوه بضمير بعدين صححوه لان مرتين جابو قطعه كامله منه ونفس الخيارات وكل شي

* عرفو طريقة استخدام الفوكابات, مين يجي بعدها from, to, with…وبعد شوفو جمل واجد ,ووين يجي الناون, الفيرب, الادفيرب..

*بالنسبة لي, الكلمات احاول باي طريقه اني اربطها بشي في حياتي واشوف جمل عليها يساعد او احط مع الكلمه كلمه ثانيه ترتبط فيها يعني أقول moist-water
*القرمر ذاكروه من الكتاب, انا قعدت تستين ذاكرت من النت واكتشفت ان سويت اكبر خطأ بحياتي. وممكن الكويزات تتدربون على النت يفيد كتبو اسم القرمر بعده كويز, براكتس, وورك شيتز

*السبيكنغ يعتمد على اللي تختبرك، بتعطيكم سؤال والتزمو بالستركتشر وقولو امثله وتفاصيل بالبودي كثير لا تصيرون بخيلات لاني بخيله بالكلام وكم مره ينبهون علي

*في فكرة قالتها مس عندنا وعجبتني, امسكو ورقة A4 وخذو موضوع من مواضيع الكتاب مثلا الـ role model. ابدو كتبو جمل واستعملوا الكلمات اللي موجوده بالكتاب واخترعوا منها جمل وحطوها في ملف وجمعو على كل موضوع ورقه وبكذا بيكون جمعتو ملف كامل حق اختبار المد + الفاينل في الرايتنغ و السبيكنغ واستفدتو.

السلبيات:

*اوقاته تقهر وتاكل اكل من وقتنا بدال مانذاكر بالبيت يعني : 8 الى 10 ومن 1-3 او 3-5 على حسب المتوى.
*الستاف غريب واحسهم دايما ينقهرون اذا جبنا درجات عاليه واذا قلنا انه الاختبار سهل. ~~(واضح اكرههم؟)~~ , يعني حطو لنا قوانين غريبه مثل ان محد تعطونه كامل الا اللي يستاهل.. وساعات بس في منهم عسل عسل عسل يجننون يطنشون ويعطون كامل.
*مستويات الاختبارات مختلفه فلا تعتمدون على اللي قبلكم, وهذا على كل المواد يعني مو شرط دفعة 219 فاينلهم سهل في اللسننق وصعب بالريدنق يعني بيصير لكم نفس الشيء..
*الستركتشرات مختلفه وطريقة الكتابه بعد حق كل مس غيير.. وهذا يسبب ازمه في التصحيح. يعني انا قاعده تعلمني مستي على اشياء معينه وتمسك ورقة اختباري وحده عندها افكار ثانيه وانقص عشان ما اعرف شنو في مخها شسوي يعني؟

هذي الماده يبيلها مذاكره كل يوم حرفيا خصوصاً الفوكاب
انا في طريق الجامعه افتح الكلمات ومعانيهم لين ما اوصل وكويزات اونلاين

المواقع اللي انصح فيها :

Dictionary :
https://www.ldoceonline.com/
https://www.merriam-webster.com/ يشتغل الاب بدون نت Vocabulary :
http://sentencedict.com/
https://www.vocabulary.com/

اما السبيكنغ والريدنغ فدورو اختبارات ايلتس

احياء الانسان – Bio-102

5 Credit

اعتبر ستافهم لطيفين كل اختباراتهم بنفس المستوى وعلى حسب المعلومات الموجوده والمذاكره الاداء. يعني تلقون اسأله موجوده على الفهم، من الكتاب، حفظ السلايدات، الاسأله البنفسجيه اللي بالكتاب طبعا مع تغيير الصيغه, كمثال للاسأله البنفسجية جانا سؤال بتلقونه في تشابتر اليورانري او الاندوكراين عن بيتزا الببروني جا بس بدون بيتزا فقط ان في شي زاد وشنو بيصير الحين؟ ان شاء الله تفهمونه اذا درستوه.

ÙØªÙØ¬Ø© Ø¨ØØ« Ø§ÙØµÙØ± Ø¹Ù ÙØªØØ³Ø¨ Ø§ÙÙ

بالبدايه خصوصا السمستر الثاني قمنا ندحل بالسستمز وشوي طوال كنت احسه صعب وشلون بفهمه بس اقرا الكتاب وابدا حبه حبه وافهم يصير سهل سهل سهل

في اشياء مهمه كمذاكره تحطونها بعين الاعتبار:

الكتاب احيانا يشرح شيء مو موجود بالسلايد، بتحسون انه اوكي مفهوم بس سبحان الله يجيبون عليه سؤال مادري شلون صاغوه وسووه. ف وانتو تذاكرون اقرو كل جمله بتركيز.

البايو اذا انت مذاكر بتحل اما اللي مو مذاكر بيطول في كل سؤال وبيضيع وقته فلا تتجرئون وتدخلونه بدون مذاكرة عدله.

لازم بكل اختبار سؤال يجي من صوره فركزو على الصور لان الصور مهمه مهمه مهمه ولا تطنشونها ابدا.

الكلمات اللي فيه سهل تنحفظ ماعانيت منها ابد لان استخدامها واحد مو متنوع مثل الانقلش

نوع التيشوز وشنو يصير فيها مثال : (ابيثيلام : تبادل الغازات)

ترتيب، اي شي فيه خطوات تسلسليه مهم فيها الترتيب ممكن يسال شنو صار قبل شنو بيصير بعد.. من الصدف الحلوه اللي صارت لي في السمتستر الأول عانيت ووانا قاعد احفظ سلايده فيها 3 خطوات اظن حق تضاعف الـ RNA. رحت عند امي وخلاص قلت لها مو قادره تدخل المعلومه طالعت فيديوهات صور كل شي. قالت لي اقريها مليون مره يمكن تحضرج بالاختبار كلمحه. ورحت الاختبار اخر شي ماطلبو ولا تفصيل طلبو بس الخطوات يعني طول الوقت قعدت اقرا العناوين بعدين الكلام.. وطلبو بس العناوين.

نوع دخول المواد داخل الخليه (دفيوشن، اكتف وهكذا…) راح تتفصلون في هذا الشي بالستمستر الأول لكن بالسمستر الثاني بتكونون تدرسون انتقال الماده مثلا في الجهاز البولي في اكثر من ماده بتنتقل فتعرفون كل ماده وطريقة انتقالها.

بقوقل فيه صور رهيبه جداً تسهل المعلومه وتوضحها كنت ادور دايما على صور حق انتقال المواد مثل الـ steroid وصور لبعض الاشياء اللي شفت اسمهوا وماعرفتها.

كثير استخدمت mnemonic و rhymes
وفي موقعين استخدمتهم عشان يساعدوني في هذا الشيء :
https://www.rhymezone.com/
https://spacefem.com/mnemonics/

كاهوت احيانا اذا كنت طالعه مع اهلي افتح كاهوت واحط اسم السستم وتطلع لي اسأله احلهم كانه لعبة
https://kahoot.com/

بالايباد في لعبة حق الخليه (السمستر الاول) رهيبه هذي صورتها :

وحق السستمز (السمستر الثاني) في كثيرر بس حطي اسم السستم ويطلعون ابلكيشنات ساعدوني في لاب البايو اكثر

من الاكثر المواد اللي متروووسه فييديوهات باليوتيوب وبحط هنا اكثر الاشياء اللي فادتني شخصيا (حطيت عليهم لايك باليوتيوب) :

السمستر الاول

Eukaryopolis – The City of Animal Cells: Crash Course Biology #4
https://www.youtube.com/watch?v=cj8dDTHGJBY&list=LLlDOu9s-wjQNHce7ALSMjag&index=57&t=0s 5.2.1 Haploid v. Diploid
https://www.youtube.com/watch?v=1yu1Zuy_uEQ&list=LLlDOu9s- wjQNHce7ALSMjag&index=42&t=0s Cell
https://www.youtube.com/watch?v=URUJD5NEXC8&list=LLlDOu9s-wjQNHce7ALSMjag&index=46&t=0s Osmosis and Water Potential (Updated)
https://www.youtube.com/watch?v=L-osEc07vMs&list=LLlDOu9s-wjQNHce7ALSMjag&index=43&t=0s Cell Cycle and Mitosis
https://www.youtube.com/watch?v=7NM-UWFHG18&list=LLlDOu9s-wjQNHce7ALSMjag&index=41&t=0s The Cell Cycle (and cancer) [Updated]
https://www.youtube.com/watch?v=QVCjdNxJreE&list=LLlDOu9s-wjQNHce7ALSMjag&index=36&t=0s Alleles and Genes
https://www.youtube.com/watch?v=pv3Kj0UjiLE&list=LLlDOu9s-wjQNHce7ALSMjag&index=26&t=0s

السمستر الثاني

قناة يوسف العويشر: طالب طب شرح سلايدات 219 كاملة
https://www.youtube.com/channel/UCRafI0sXTmqhaq3mIL2sgKA

فيه لاب : اللاب ماحبيته لان اللي عندنا تشرحه من قلب واحنا للحين ماخذنا اللكشر خصوصا في السمستر الثاني، وراسنا يصير مصدع ومالنا خلق من ٣-٥. اما مذاكرته كانت جداً سهله بس ذاكرو كل شي حرفيا حتى اللي ما شفتوه بالمكرسكوب يجيبونه صوره ولمن بيسوون مراجعه نصيييحه نصييحه تعالو مذاكرييين مره بتفرق معاكم انا اذكر مامداني بس فتحته بشكل سريع حددت ايش اللي لازم اشوفه ايش اللي مميز في كل سبيسمنت والسبينلق قعدت اكرر مليون مره. بالاختبار انتبهو على السؤال لان احيانا يطلب شي غير اللي في بالكم. مثلا جابو لنا كارتلج وقالو وين اللوكيشن الجواب كان Trachea. اما ضبط المكرسكوب كان فعلاً يقهر ان بس دقيقه وواجد مامداهم واختبصو لكنهم متساعدين مره. لكن على السؤال الواحد بيمديكم الدقيقة واكثر بعد.

اذاكر انا من الكتاب ومره درجاتي تفرق اذا ذاكرت من الكتاب بتركيز. وانا رايحه الجامعه اقرا السلايدات واترجم الكلمات الصعبه واحيانا الاحظ ان كان الجمله مقطوعه ولمن الدكتوره تشرح تقول ان هذا يقصد شي معين ويطلع صدق مقطوع. فذاكرو من الكتاب. سنة ٢١٨ جابو كامل وهم مذاكرين من السلايدز اما دفعتنا لازم من الكتاب. من رأيي: حتى لو دكتور بايو مسك الاختبار وحله مابيجيب كامل الا اذا درس من الكتاب لان فيه كلام موجود مختلف عليه بالانترنت والكتب. مثل: اي طبقه اكثر وكان الجواب ببسين وبالنت طلع HCl.
الدرجات كلها في جيبكم حضور وكوزات وغيره، اللي عليكم ان تذاكرون المد والفاينل واللاب عدل

الفيزياء – phy-104

3 Credits

احترت احط مين اول لان عندنا ثلاث مواد عليها ٣ كردت، كيمياء، فيزياء والانجليزي التخصصي. اخترت الفيزياء لان يمكن تعتبر من اصعب المواد واللي الغالبية يكرهها.
انا دخلت اول اختبار وجبت فيه F. مانصدمت كثيرلان بالاختبار كنت حيل متوهقه. بس قررت انا وثلاثه من صديقاتي ندخل عند مدرس وحده نعرفها دخلته اسمه احمد. توكلنا على الله وبدا يشرح لنا. المدرس رتب افكارنا ورانا طريقة الاساله اللي تجي فهمنا كل شي وعلمنا اسهل الطرق للحل. كنت ما احضر حصص الفيزياء لاني قاعد اخذ حصص خصوصيه تغنيني عنه فما اقدر اقولكم عن طريقة التدريس بجامعتنا وشلونها كل اللي اعرفه ان البنات يعتمدون على فيديوهات د. نزيه. د. نزيه هو دكتور فيزياء في قسم الاولاد تصور في سنة ٢١٨ لان البنات قالو له ان نبي شرحك ووافق وخلى واحد من الاولاد يصوره. وسنتنا نفس الشي الا ان بعض المحاضرات ناقصه على ما لقينا شخص يتطوع ويصور الا متأخر. فمن البدايه حاولو تضبطون وضعكم. سنتنا كانت اول مره جامعتنا تسوي اختبار مثل “التحسين” نزيد فيه لين مانوصل درجة النجاح وكان ٦.

بالنسبة لي ضعت واحد بالسمستر الاول. كانت التشابترات مو عاجبتني ابد وشوي مو عارفه شنو احل شنو اسوي. السمستر الثاني الاستاذ غير من طريقته واستعمل الايباد وحل ملفات وقام يرسل لنا الحل صوت وفيديو واستفدنا منه اختصار للوقت فبدال مايشرج لنا شيء كامل يعطينا الملف مشروح ويجينا يوم ثاني يقولنا شنو اسألتكم على الملف. تست ٣ جبت فيه احسن درجه كنت اذاكر اول باول. اول ما ينزل محاسنه ورق ابدا احله. التشابتر اللي عن الفلودز, حبيته حيل حيل حيل وشوي من الويفژ. الالكترستي ابداً ماحبيته كرهته كره (مع ان د. هبه تقول انه المفضل لدى الطالبات). اما الرادييشن بتركيز قوي وحل مسائل فهمته عدل حتى بالاختبار حليت مسائله كلهم صح.

بالنسبة للمذاكرة، فانا اعتماد كلي على الاستاذ يعطينا اوراق ونحلها وتكون اوراق محاسنه يجي نفسها بالاختبار. الاختبار لو كان ١٠ اسأله بيكون ٩ اسأله حل مسأل وسؤال واحد بالحفظ او بالفهم. ضروري تبدون بالمذاكرة بالاولويه للحل. عادي اذا انتي مو فاهمه شقاعد يتكلم عنه هالتشابتر ولا شالسالفه ولا شلون الكلام غير منطقي عااادي مسكي الورقه وحلي حلي حلي حلي , خلي يدج تتعود على هذا الشي. تعلمو طريقة الـ solve بالحسابه اختصرت حياتي. بالفاينل انقذتني حليت سؤال اخر ١٥ ثانيه من الاختبار متخيلين؟

اللاب: احنا كنا اول دفعه يتطبق علينا اختبار عملي. كان الاختبار سهل وعلى القرعه تسحبين رقم وتروحين عند تجربتك. واهم شي وقت التجربه بكلاسات اللاب اشتغلو بيدكم عشان بالاختبارعشان تذكرون. كنا نطلع مره 4 ومره 5 المغرب على حسب التجربة. ما كان سيء بس كان يجيب النوم ومانفهم شي من الثيوري بس العملي نمشي فيه. فيه تجارب ممتعه جداً وفي تجارب تجيب العصبية ذيك اللي ودج تصرخين. بيطلبون منكم اللابكوت,حاسبة,ورق بياني للرسم, قلم ازرق, قلم رصاص, مسطرة ومساحة.

كيمياء – Chem-103

3 Credits

في هذا الكورس السمسترين بينهم اختلاف شديد, في السمستر الاول بتدرسون اشياء سهله وبسيطة مثل التحويل بين الوحدات, انواع المواد والمخاليط, انواع الروابط, طريقة التسميه, معادلات خفيفه كلها تعويض بارقام, انواع التفاعلات ووزنها.. اما السمستر الثاني بيكون اورقانك كيمستري, اول تشابتر بتدرسون الاورقانك بشكل عام بعدين تدخلون في كل مجموعة وظيفيه مثل الكحولات والايثرات والثيولات والايسترات بتعرفون فيها طريقة التسميه : الاسم الشائع والايوباك والتجاري. التفاعلات اللي تصير لها, اشكالها وتكويناتها..

اول مادخلنا الجامعه خلينا بنات دفعة ٢١٨ يتكلمون عن المواد ويعطونا رايهم والاغلب قال لنا : الكيمياء A+. كنا متفائلين وحتى كنا نذاكر الكيمياء قبل اختباره بكم يوم. اول اختبار كان لطيف حتى الاڤرج كان مرتفع. بعدين جا تست ٢ (فاينل السمستر الاول) وكانت مثل الصدمه. الاختبار كان صعب، جابو لنا اشياء تشبه الـ cases مثلا دكتور يبي من صيدلي جرعة وهكذا والاسأله كثيره 50 سؤال وكل واحد عليه 0.5 وهالدرجه كبيره. كل 10 اسأله بقريد. طلعنا من الاختبار مصدعين حرفياً مو قادرين نذكر ولا شي. والدرجات كانت تحرق القلب قريدات طارت منا بسبب هالاختبار وحسينا ان مافي مجال للتعويض. طبعاً كنا نبي كويزات اونلاين عشان نضمن اي شي ويقلل من كمية الدرجات اللي على الاختبار الواحد. والستاف يقولون ان احنا نبيها بيدنا عشان نعطيكم كامل مايروح عليكم اختبار وتنسونه وتنقصون. جاء السمستر الثاني ووصلنا خبر ان بيسهلونه لانهم كانو يبون في تست ٢ نحل اسأله بمستوى عالي وسهلو علينا اخر اختبارين وثبتت قريداتنا. وهذي الماده اكثر ماده تحلطمنا ان اختبارها وقته قصير ونبي حتى لو عشر دقايق زيادة واكيد يجينا الرفض.

بالنسبة للمذاكره من السلايدات بس واي شي موجود بالسلايد بيجي بالاختبار، انا اتدرب في المواقع كويزات وورك شيتز. بنات واجد استفادو من سلايداتي لاني اكتب مع دكتورتي اسيل ومن النوع اللي تعطي تدريبات واجد. انصحكم ان تحاولون تجمعونها في ملف واحد. انا اللي فدت فيه غيري ان سلايداتي اكتبها بالايباد وكانت واضحه كل اكسرسايز مع اي سلايده. تدربو عدل على التسميات في الاورقانك بتجيكم كثيرررر واعرفو الاوليه حق مين, الابجديه, الترقيم, ومين يحسب بالابجديه ومين ماينحسب وغيره… جيبو معاكم بالاورقانك 4 الوان مختلفه انا كنت اجيب وساعدني واجد بالتسميه واسألو عن الطريقه د. اسيل او طالباتها. لا تجيبون لون وردي واحمر وتتلخبطون خلوها الوان وااضحه انا جبت ذهبي اخضر ازرق احمر وبنفسجي وكل مره شكل بس اهم شي مايتشابهون ابد.

اللاب من امتع اللابات واسهلها ماعدى اول كويز ورقي كان صعب بالنسبة لي (يعتمد على دكتورتكم اللي تدرس اللاب) لان جابت لنا اشيا مو مكتوبه بالمانول شرحتها بس وماثبتناها. فذاكرو زين فيه ولا تستنقصون منه لان هالكويز نزلنا قريد واحنا متمسكين فيه بـ 0.5. كنا اغلب الوقت نطلع فيه بدري يعني الساعه 4. حتى اذا كنا نختبر تجربة، طبعا اختبار التجربه يكون شرحته الدكتوره تجون الاسبوع الثاني تعطيكم ارقام كل رقم بمادة تسوون عليها تجربه وتشوفون النتايج وتحددون الماده طبعا المواصفات بتكون قدامكم على السبوره. كان ممتع جداً ومفهوم ومايجيب النوم. من الاشياء الحلوه فيه ان اللي يدرسونه يربطون اللي بتاخذينه بالمستقبل فيقولون: اللي بتدخل التخصص الفلاني بتتعامل مع هذي الماده.

فديوهات فادتني شخصياً من اليوتيوب

السمستر الاول:

Molarity Practice Problems
https://www.youtube.com/watch?v=SXf9rDnVFao&list=LLlDOu9s-wjQNHce7ALSMjag&index=31&t=0s
Mole Ratio Practice Problems
https://www.youtube.com/watch?v=S6UQX7ZdkTg&list=LLlDOu9s-wjQNHce7ALSMjag&index=32&t=0s
Naming Acids | How to Pass Chemistry
https://www.youtube.com/watch?v=apmiikhKML0&list=LLlDOu9s-wjQNHce7ALSMjag&index=30&t=0s
Naming Ionic and Molecular Compounds | How to Pass Chemistry
https://www.youtube.com/watch?v=nijb6UMvZuE&list=LLlDOu9s-wjQNHce7ALSMjag&index=29&t=0s
Valence Electrons and the Periodic Table
https://www.youtube.com/watch?v=yADrWdNTWEc&list=LLlDOu9s-wjQNHce7ALSMjag&index=28&t=768s
VSEPR Theory: Introduction
https://www.youtube.com/watch?v=nxebQZUVvTg&list=LLlDOu9s-wjQNHce7ALSMjag&index=27&t=854s

السمستر الثانين

من افضل القنوات في شرح الاورقانك
https://www.youtube.com/user/Leah4SciTutorials
Haworth structure
https://www.youtube.com/watch?v=WMgo7WHcI7U&list=LLlDOu9s-wjQNHce7ALSMjag&index=2&t=0s
مهمممم مرههههههه وبينفعكممم وتراه قصير || How to Balance C6H14 + O2 = CO2 + H2O: Hexane Combustion Reaction
https://www.youtube.com/watch?v=yq-0FarhEv4

الانجليزي التخصصي والاكاديمي – Eng-102

3 Credits

هدا الكورس بتاخذونه فقط السمستر الثاني، بياخذون جزء من ساعات الانقلش الحينيرال وبيحولونه الى ESP و EAP. خلوكم منتبهين ان غياباته غير الجينيرال يعني غياباته تأثر وتنقص اكثر بالنسبة المئويه للغياب. وتقدرون تغيرون بين الجينيرال والتخصصي لان المس وحده, غالبا اللي بتدرسكم لسننق بتدرسكم تخصصي. واللي تدرس رايتنغ بتدرسكم اكاديمي. وممكن يدرسونكم ثلاث مسات على حسب ترتيب الجامعة. بيكون فيه كتابين. ESP (التخصصي) و EAP (الاكاديمي)، طبعا الاكاديمي غالبا ~~مسحوب عليه~~ لان بس تاخذون منه قرمر والقرامرات سهله ان شاء الله وكان موحد حق كل المسارات نفس الكتاب. اما الـ ESP فاعتماد كلي على الفوكاب. طبعا عندي ذم عن الكتاب الله يعينكم على تحلطمي. فيه واجد كلمات سننمز ماكانو يعلمونا ان في فرق بينهم. اذا سألنا قالو سننمز ولا سيرش ان دبث. واجد كلمات تعريفاتها غلط او اصلا مافي فرق. وقالو لنا مشو فيهم لان اللي سوو الكتاب تخصصهم مو بايو. كانو مدخلين طرق رايتنغ وقرمرات واحنا مابنذاكرهم فمادري ليش زيادة الحبر وثقلو لنا الكتاب. لكن اللي عجبني فيه ان معطينا في كل مجموعة فوكاب، المعاني والجمل في نفس الوقت. الكلمات فيه حلوه وبتستخدمونها بالحياه وااجد. وفرقو بين السننمز بعطيكم موقع انقذني في الفاينل علمني على فرق وجابو لنا الكلمتين. كانت (Abstain & Refrain) ومرضيين مينتال (عقلي) واحد يبدأ بـ N والثاني بـ P ينتهون بـ SIS نسيتهم والله. طريقة الاختبار نفس طريقة اسألة الجينيرال الفرق توزيع نوعية الاسألة : 40 فوكاب بس فيه قطعه صغيره ناقصها كلمات وتعبونها, 10 قرامر, 10 ريدنق ويجي شي صحي يشبه مواضيع الـ esp
https://wikidiff.com

Learning Skills & Communication Skills | مهارات التعلم والتواصل

2 Credits

دمجت الكورسين في فقرة وحدة على انهم مختلفتين بالمحتوى والسمستر. لكن لان الكلام بيكون قصير فيهم وطريقتهم وحده.
في السمستر الاول بتدرسون (Learning Skills) بيكون وقتها نفس وقت اللابات اما ١-٣ او ٣-٥. لكن عندكم كل اسبوع. بيشرحون لكم طرق التعلم والدراسه وكيف تتغلبين على الصعوبات وكيف تقومين بواجباتك وترتيبها وطريقة تنظيم الوقت يعني سوالف. السنين اللي قبلنا كان مشروعهم اللي عليه ٢٠ درجة هو بحث كامل. لكن خففو علينا وسوو لنا نقد بحث. بيكون فيه قالب عليه اسأله بعد ما تقرون البحث تجاوبون : بيشرحونه لكم بالتفصيل وبيعطونكم مثال. نصيحتي لكم ان لمن تبحثون عن بحث دورو واحد ترتيبه نفس الصوره هذي. منه وفيه محددين الخاتمه الاوبجكتف والمقدمه كل شي واضح مو كلام على بعضه ومو مرتب وشوي تتعبون على ما تفهمونه.

السمستر الثاني بتاخذون Communication Skills الكوميونكيشن في ناس قالت اسهل وفي ناس اصعب من الليرننق. الفرق ان فيه طلبات اكثر مو اكثر اكثر لا بس طلبين لكن شغلهم اكثر. بيتكلم الكورس عن طريقة التواصل بين الناس وشنو اللي يعيق التواصل واشياء عامه تعرفونها بس بيعطونكم لها اسم مميز. مثلا الـ “stereotype” وهي الصورة النمطيه مثلاً ان زوجة الاب دايماً شريره وظالمه, او ان البريطانيين كل يوم يفطرون بيض وفاصوليا. بالنسبه لطلباتهم، في برزنتيشن بـ ٢٠ درجة يكون عن عمل تطوعي تسوونه وفيه افكار واجد عليه طبعا اول شي تطرحون الفكره للمس وبعدها توافق عليها وتعلمكم شنو الاجرائات اللي تسوونها. ومن احلى الافكار اللي شفتها : هدية قرطاسيه للبنات اللي اسرهم متعففه في المدارس. بحيث ان يكلمون المدرسه ويتفقون معاهم على عدد ويجهزونه ويرسلونه لها و الفكره الثانيه ان يحطون منزل للقطط فيه اكل لهم. الطلب الثاني عمل C.V. وعلى حسب المس. في مسات بيقولون لكم لازم تسوون سيفي كامل تسوين روحج جراحه دكتوره ممرضه.. وفي مسات يقولون لا عطينا شخصيتج الحقيقيه. وفيه نماذج كثيره ان شاء الله تلقونها بالقروبات سويناها وخذنا عليها درجات كامله. وبعض المسات طلبو الـ Letter.
اذا جيتو تسوون الـ C.V. شيكو على هذا الموقع فيه سيفيات كثيره لناس واقعيين عشان تعرفون بالضبط كوظيفة صحيه ايش تحطين في كل فقره.

https://www.linkedin.com

بالنسبه للاختبارات، كويز وفاينل نفس الطريقه الاثنين. الكويزات بيكون في كويزين على مدار السمستر. الكويز شوي نحيس. يفتح لكم الساعه 2:00 ويسكر دخوله 2:10. وعندكم اظن 20 دقيقه للحل. واي وحده تواجه مشاكل سواء ماقدرت تدخل او سكر عليها او اي شي, تصور فيديو وصوره للمشكله وترسلها لليدر, ولمن يتأكدون انها حقيقية يعيدونه ورقي او اونلاين. انا شخصياً اقعد الصباح واذاكره لاني اركز مع المس لمن تشرح فيكون سهل علي واذاكره سريع سريع. بالنسبه لي, الكوميونكيشن اسهل من الليرننق. اما الفاينل بيكون ٤٠ سؤال اتوقع اختياري وفيه مقالي. المقالي سهل جداً وتألييييف. فيه سؤالين اجباري تجاوبين عليهم. وحاطين اتوقع ١٢ سؤال تجاوبين على ٩ من اختيارج. الاسأله تجي سهله مثل: كيف تنظمين وقتك؟ كيف تركزين بالحصه؟ ليش لمن تروحين لوظيفه تلبسين كويس؟ ايش تعلمتي من هذا الكورس؟ ايش اللي طورك فيه هذا الكورس؟ اما مصادر المذاكره كل واحد ومزاجه ناس السلايدات وناس لكشر نوت والاسأله الثانيه تجي اشياء تشبه الكويزات.

الحاسب – COMP-131

2 Credit

بيكون في السمستر الاول, في مادة الحاسب بالبداية بيكون دراستكم كلها نظري بتعرفون عن اجزاء الكمبيوتر وبعدين عن نظام المستشفيات الحاسوبي. اعتمدوا على الكتاب لان يجيبون اسالته نسخ لصق من الكلام اللي موجود لا تعتمدون على السلايدات واقرو الامثله لا تسحبون عليها. بيكون اول كويز تاخذونه هو عليه 5 درجات عن اول تشابتر. بعدين بتاخذون المد, بيكون عن اول تشابترين اتوقع عليه 25 درجة, وبعده كويز ثاني 5 درجات عن التشابتر الثاني. بعدها بتاخذون برامج عملية اللي هي الاكسل والاكسس. الاكسل بيكون شغلكم فيه واجبات انصحكم تجمعون كل واجبات اللي يعطونكم المسات وتتدربون عليهم وتستفيدون من بعضكم. اما الاكسل بيكون عليه مشروع 10 او 20 درجة وكل مس عندها طريقتها. اهم شي مسكو ورقة التقييم وامشو حبة حبة واشتغلو عليه وسوو العلاقه عدل من البداية لان اذا سويتوها غلط شغلكم كله بينعاد. والفاينل بيكون عن الاكسل والاكسس عملي. نصيحتي مسكو الواجبات وكل شي تحصلونه وتدربو زييييييين التدريب بيخليكم سريعين وتعرفون كل شي بدون ما تتعطلون. حطي تايمر واشتغلي وشوفي كم تاخذين وقت وعيديه لين مايصير الوقت اللي اشتغلتي فيه يكفي الاختبار الفعلي. انصحككم تختارون قروبات العمل بعناية لان العمل ضروري يكون جماعي. وراح يكون في اسأله تسألكم عنها وتقولكم كيف سويتو هذا وهذا فلا ترمون الشغل على وحده لان بتتنقصون لو صادتكم.

الرياضة – pedu-162

1 Credit

بيكون في السمتسر الثاني, الكردت الواحد يخليني اتكاسل اتكلم عنه. وعن نفسي اكره الرياضة جداً. لكنه الكورس مو بس عن الرياضة, فيها الجانب الصحي التوعوي
(وترا يموتون على هالكلمة كثر ما قسم الليرننق يحبون تايم مانجمنت) . بتتعلمون عن الاسعافات الصحيحه, السلوكيات الصحيحة وغيرها… اكثر مادة عليها تكلفيات. اول تكليف بيكون عرض برزنتيشن قصير وعلى حسب كل مس. احنا كان طريقتنا ان ينعرض قبل الدرس مجموعه وحده او مجموعتين تعرض بعدين تشرح هي الدرس. وبعض المسات بعد الشرح تبدأ نشاط بدني وتنقلون لقاعه للرياضه وبعضهم يخلونه اسبوع شرح واسبوع رياضة. في هذا البرزنتيشن الخيار لكم تكلموا عن اي شي له علاقة بالرياضه والصحة. في بنات تكلمو عن التنفس, الرياضات الهوائية وهكذا… ثاني تكليف بيكون الحملات. بتتقسمون الشعبه كامله الى مجموعتين تقريباً 16 بنت في المجموعة الوحدة وبتختارون موضوع يكون توعوي للناس اللي بالجامعه مو شرط بنات طالبات صحي لا, لكل الناس. بيجون بيكون اتوقع 4 او 3 مسات بيسمعونكم ويقيمونكم, بيكون عندكم قسم فيه طاوله تزينونها وتسوون اللي تبونه. ايضاً بتسوون حساب اما على تويتر او الانستقرام او غيره.. من رأيي انا افضل الانستقرام لان لو احد دخل الحساب بيتكون المواضيع والصور مرتبه وتجذب النظر. لكن الاغلب سوا تويتر. وبتسوون شعار واعلان تلصقونه على مبنى الجامعة. عليه 10 درجات . انصحكم سوو بروووفه مجموعتنا كل وحده جهزت شي ويوم جا العرض كل وحده قالت كلام ينافي الثاني بس المسات مادري شلون ماسمعو.

بيخلونكم تسوون رياضات بختصر لكم الموضوع وبدخل دايركت اول اختبار عملي بيكون ركض مسافه معينه رايح جاي مفروض توصولون 10 مرات هذا الافرج دايماً, ومعاه الاسعافات الاولية (اول خطوات) بتنادون المريض وتتصلون على الاسعاف وبس. بعدين الاختبار النهائي العملي بيكون فيه اختبار رشاقه, عبارة عن دوائر فيها ارقام تنطين من رقم لرقم باسرع وقت (تلقون الصوره في مدونات ثانيه انا ماحفظتها عندي) الافرج هو 3 ثواني اللي تجيب اقل من 3 ثواني تضمن الفُل مارك. والوثب هو عباره عن قفزة كبيره تسوينها مافي افرج معين يتكرر هم يجمعونها بعدين يطلعون الافرج. الاخير بيكون الاسعافات الاولية تنفس وانعاش تدربو واااجد عليها. الاختبار النهائي النظري بيكون مصدر مذاكرته الكتاب يا ان مذاكرته ممله بشكل مو طبيعي. بيجي الاختبار صح وخطا وخيارات. الصح والخطأ قسمين معلومات عامه و5 اسأله لسلوكيات يعني ان صار كذا كذا فجاء شخص وعمل كذا..

النهاية – the end

اتمنى اني افدتكم ولو بالقليل, تذكرو كل اللي موجود كان من تجربتي الخاصة. طالبة من مدينة الدمام كانت في شعبة 5 علمي وشعبة L انجليزي. درسوها مسات معينين. كانت تحت اختبارات معينه. كل بنت لها تجربة مختلفة خاصة فيها. حاولت قد ما اقدر ابين لكم ان الجامعة ما كانت اصعب شيء ولا كانت اسهل شيء. وبعد عطيتكم كل شيء فادني ولاحظت تطوري منه. هذي المدونة اتمنى انها تحفزكم ولا تحبطكم. اتمنى لكم كل التوفيق واشكر لمن قرأ المدونه حتى النهاية وتحمل كمية الكلام اللي مكتوب فوق. انا موجودة في تويتر لاي شخص يحتاج مساعدة وتقدرون تكلموني على الكيوريس كات رابطة موجود داخل حسابي.

ZaynabTiger@

السنة التحضيرية